H u l i n g G a b i

Katatapos ko lang magligpit. Bukas kasabay ang officemate ko at bf nya, susunduin ako kasabay pababa. Hmm.. Sigurado ba ako sa pinapasok ko? Pero kailangan eh. Kung babalik sa dati, keri basta nasubukan. Nung pumunta ako, ayos naman. Ang jeje lang na part sa akin yung nasa harap ang bag ko dahil madami daw mandurukot. Walang pinagbago. Hay. Anuna? Sana dumating araw na malaya ka makakalakbay sa lugar na iyon. Ganun pa man, susugal ako. Eto pala ang ilan sa mga bagay na minsan naging mahalaga sa akin at akin silang natagpuan at panahon na para itapon.

Narealized ko, mas tumatanda tayo, mas nawawalan tayo ng pake sa sasabihin ng ibang tao. Kung saan ka masaya, gora lang, basta wala ka tinatapakan ibang tao. At kung saan ka takot, yun ang suungin mo, malay mo yun pala ang susi sa pagunlad mo at kung hindi naman, ang mahalaga natuto. Sa bagong kaganapan sa buhay ko, cheers! HAHAHA

Ngapala, kailangan ko ng raket. lol! Dagdag income, dahil madami bayarin.

(o'.'o)

L A N G O Y

Sulit na dive. 4 dives sa daytrip.

Nagkaproblema lang ako sa mask ko nung 2nd dive. maluwang pala. Tas medyo hirap ako mag equalize, first time ko kasi gamitin mask kaya nangangapa pa. medyo ilang magtanggal mask sa ilalim kasi nga may dalawang bagong butas sa tenga ko. Natatakot ako matagalan ako magkabit mask. Pag tumatama nga bubbles sa tenga ko medyo masakit eh. Ayusin ko na maige mask ko next time, ngayon alam ko na tamang higpit nya. Kaya medyo fail 2nd dive kung kailan may jacks. Pero huy, ang ganda ng school of jacks. Ang ganda nila  tignan! Buti nagpakita at naabutan pa dahil nga sa mask prob ko. Haha tas madami pang isda at mga clam. Ang kalmado sa ilalim. Sarap! May iba talagang mundo. Kailan kaya next? Gusto ko muli.

Ngapala, sobrang gusto ko gamit kong fins. Maganda hiram at ginagamit ko dati na scubapro jetfins at proven na maganda yun. Pero etong fins ko na nabili waaa eto yung fins para sakin. lol. Apeks rk3. Eto na yun. Sobrang di ako nahirapan gamitin siya at sakto lang din yung haba nya sa akin. Mahal ko na siya. Bakit white? Since beginner ako, para makita nila ako agad. next time na yung orange na fins na nakita ko. Pag yumaman na ko. Nyahaha. Salamat sa safe dive po. :)

Update sa work, baka nov na ko magstart. Good luck!

  

(o'.'o)

s c a r e d AF

Natatakot ako sa aking pagalis, ngunit sa tingin ko ay kinakailangan. Ako ay kanilang pinipigilan, salamat sa mga piling taong may pakielam. Hindi ako perpekto at madaming pagkakamali sa mundong ito na kung pwede lang ibalik at masolusyunan. Sa trabaho, pamilya, relasyon, lahat yan may salto. Ngunit hindi na maibabalik ang nakaraan. Sa hindi inaasahan na pagkakataon, inilatag ang pagbabago at akin itong sinunggaban. Pagod na ako sa magulong mundo. Oo alam ko walang perpekto pero kung mas magulo ang papasukin ko, eh ano, ang mahalaga bago. Bagong kaalaman, pakikisama at pagmamasid sa kung ano ba ang nasa paligid ko. Kung ibabalik ako sa dating trabaho, ayos lang, ipagpapasalamat ang pansamantalang karanasan. Sa totoo, sobrang natatakot ako sa kung ano ang papasukin ko. Matagal ng nawala ang dating bibo. Ako ngayon yung tipo ng tao na makikita mo sa sulok kung papasok ka sa isang kwarto. Yung taong mas pipiliin pa magisa kesa makihalubilo. At kung makikihalubilo sa mga piling tao lamang dahil kapag madami, gusto ko na maglaho. Ako ngayon yung nawalan na ng lakas ng loob dahil pakiramdam ko ang bobo ko. Ako yung tao na biglang naging pipe at hindi na makasabay sa galaw ng mundo. Hindi mo ako mapagsasalita dahil wala lang naman ako. Ako ngayon yung hindi na interesado sa mga lalaki dahil pakiramdam ko walang magmamahal sa akin ng totoo. Ako ngayon yung pakiramdam na napagiwanan na ng lahat. Ako ngayon yun pinipiling magpakabuti ngunit hindi ako perpekto sinasabi ko na sa'yo. Ako ngayon yun. Ang babaeng pilit na ngumingiti sa araw araw at pilit na lumalaban para sa buhay na mayroon ako. Gusto ko sana manatili, gustong gusto ko ngunit kung hindi ko susubukan paano ko malalaman kung ano ang nasa kabilang dulo..

Sa buwan na ito ako ay lilisan. Sa ating muling pagkikita, Salamat family.

Balik M a y n i l a, yan ang ganap ko.

(o'.'o)

r i p c u r l

Siya si r i p c u r l. Isang aspin na doggo. Aso ko ba siya? Hindi eh. Pagala gala siya eh pero dito dito lang naman malapit samin. Nung nakita ko siya dati, nagustuhan ko na siya. Pinapakain ko siya pag may tira ako hanggang sa tumagal, pinagluluto ko pa siya ng pagkain nya. Almost 2 weeks siya nawala netong simula ng September. Ang naalala ko bago siya mawala eh dalawang araw na magkasunod ko siyang sinasabihan na paano siya kapag wala na ako. Dahil nga kasi sa mga pagbabago na ganap sa buhay ko. Tas kinabukasan wala na sya. Sobrang lungkot ko nun kasi ilang buwan ko na siyang alaga kahit papaano. Andun yung hinahatid niya ako papasok office na maraming beses nangyari. Tas siya mararatnan ko paguwi ko tho minsan nawawala pero sumusulpot siya araw araw. One time sumama pa sya sakin tumakbo sa oval para magjogging. Ang paghatid sakin sa grocery store. Tas pinagawan ko pa nga siya kainan na may pangalan nya eh. Nung nawala sya, plano ko na ipagtanong sya baka kasi nahuli buti bigla sumulpot. Muntik na ako maiyak, niyakap ko sya mahigpit. Masaya ako sa kanyang pagbabalik. Masaya ako lalo nung sabihin ko sa kanya na isasama namin siya kung san man kami lilipat. Ngunit nagkaroon na naman ng pagbabago kung pwede ko lang siya isama sa pupuntahan ko. :( Ganun pa man, susulitin ko ang mga nalalabing araw na kasama ko siya. Alam ko naman na aalagaan siya ng mga kasama ko. Salamat ripcurl sa pagprotekta sa akin sa tuwing magkasama tayo. Pero nakakatakot ang pagtahol nya sa tuwing may makakasalubong kaming ibang tao. Sa pagpapangiti sa akin sa tuwing kinukulit mo ako. Mamimiss ko din ang pagkamot sa'yo kapag naglalambing ka. Hahaha Salamat kasi ng dahil sa'yo nagbalik ang pagmamahal ko sa aso. Isa ka sa mga maikwekwento ko sa ibang tao kapag naging lola na ako. Mahal kita, r i p c u r l.

(o'.'o)

P a m p a k a l m a

Mga paborito ko.

Hindi pa rin nagbabago.

Musika nila ang nagpapakalma sa akin.

Payapa ang puso ko.

Salamat ibttz sa guitar pick.

Inabot niya sa akin. Yay!☺

/late post/

(o'.'o)

Kailan muli?

S a n J u a n L a U n i o n

B a l e r 

Nakakamiss na ang dagat. Unang beses ko sinubukan pagpaddle boarding at surfing tapos sobrang nagustuhan ko. Ang lala pa nung sa elyu, ang layo narating ko ng walang tali sa paa. Nagpanic sila eh. Pero buti nakabalik ako ng hindi tumutumba. Sa baler naman, ilang attempts bago ko nakuha at nung nakuha ko na, ayoko na paawat, masarap pala mag surf. Sa uulitin.

Maiba, gusto ko na magdive muli. Tagal rin pala mula ng huling sisid. Sana makalangoy na muli. Kailan na ng ibang pagkakakitaan at dumarami ang bayarin. Woot. 

(o'.'o)

Ay, iba na?

Nung isang araw, napatingin ako sa mga kamay ko, at akin siyang sinuri, may iba. Hindi na siya katulad noon. Madami ang nagsabi sa akin na maganda daw ang kamay at mga daliri ko. Yung bigla may magsasabi "ang ganda mga daliri mo no? O kaya ang ganda pala mga daliri mo?" Minsan ipagmamalaki pa nila na maganda ang hugis ng daliri ko. Hindi man mahaba ngunit maganda ang hitsura at pagkakahulma. Siguro raw ay wala akong ginagawa sa bahay. Ngunit sa araw na iyon, matapos ko siyang pagmasdan, ang kukong pudpod na dati ay nakahulma at madalas naka nailpolish, ang dating makinis, ngayon ay kulubot bang maitatawag iyon, may pagbabago na. Nakakita rin ako ng mga linya na hindi ko mawari sa dami ng bilang nya. Ang dating malambot na palad kung hahawakan, ngayon ay may konti ng gaspang. At sa aking pagtitig, ako ay nakaramdam ng lungkot. Sabi ko sa sarili ko, wala ng maganda sa akin, dahil hindi na katulad ng dati ang aking mga kamay. Ang isa sa mga madalas pinupuri sakin, naglaho na.

Aking binalikan ang mga kaganapan. Ang isa sa pagbabago na nagagamit ko ang aking mga kamay ay sa pagluluto. Oo. Nagluluto na ako. Kaninang dinner, nagluto ako ng bicol express. First time ko magluto nun. Nagustuhan naman nila, ubos ang kanin eh. Yung isa lang ang hindi masyado nagenjoy kasi di siya mahilig sa maanghang. Sa 6 na kumain, 5 ang nasarapan at sapat na iyon. Pati ako nasarapan kasi masarap ang pagkakaanghang gaya din ng sabi nila. Hindi ito yung anghang na ayaw na magpakain. Kaya masaya ako at nagustuhan nila. Last week nagluto ako ng chicken fillet in curry yellow sauce with salted egg  at nagustuhan naman namin ng housemate ko, napadami nga kain namin nung gabing yun. Dinala ko ang tira sa office kinabukasan at kinain nila habang lunch. Pagbalik ko office, ang sabi nila "masarap" May nagustuhan, meron ding hindi masyado kasi hindi fan ng curry. Kanya kanya din namang panlasa ang tao, kaya ayos lang. Kanya kanya din na gustong klase ng luto, kunwari ako sobrang ayoko ng pineapple sa adobo, parang ganun din yun. Tumatanggap din naman ako ng puna kung may dapat baguhin o mali, kunwari matigas pa ang karne o masyadong maanghang at kung anu ano pa. Tapos meron pa pala, nagpaturo ang officemate magluto adobo sa bahay nya tas di ko alam yung isang officemate dinala yung sobrang adobo kinabukasan tas natikman nung iba pa di pa nakakatikim luto ko, nalaman ako nagluto, pagdaan ko sa wing nila "pwede ka na mag-asawa!" lahat sila ganun sinabi. Nakakataba lang ng puso sa tuwing napupuri ang luto ko. Matutuwa mga kamaganak ko na masasarap din magluto. Hahaha pero hindi naman ako nagluto para humingi ng papuri, nagluluto ako dahil gusto ko magluto, nagpapractice ako magluto, gusto ko matuto at nageenjoy ako.

Uhm pero sa totoo, medyo naluha ako sa ganap na ito ng mga kamay ko. Hahaha Sobrang gusto ko rin ang aking mga kamay. Ngunit totoo nga na ang ang panlabas na kagandahan ay lilipas rin. Masaya ako na minsan sa buhay ko, naging maganda sa panlabas ang aking mga kamay at sapat na iyon. Sa ngayon, masaya ako na hindi man kagandahan ang aking kamay katulad nh dati, ito naman ay nagbibigay ngiti at busog sa mga tao sa pamamagitan ng simpleng luto ko at para sa akin ito ay maituturing rin na kagandahan. Salamat pa rin.

Tsaka nakapaglinis na rin pala ako ng toilet syempre pati toilet bowl. Hindi lang once.. mga twice. Oops! HAHAHA

(o'. 'o)

K is for?

Late post. I was at K o ta K i n a b a l u 2 weeks ago. People are nice. I love their food.. Ohh laksa. Where to go next?

(When it comes to work, there will be major changes but uhm I am trusting God to his plans and I'll do my best not to give up on life. Stay sane, H.)

(o'. 'o)

O P E N

Nanood ako ng dalawang pelikula mula sa P P P 2019. Tawang tawa ako sa T h e P a n t i S i s t e r s. Pinanood ko ang D i e B e a u t i f u l at B o r n B e a u t i f u l, kaya hindi para palampasin ito. Gusto ko din kasi ang mga actors na kabilang dito. Tapos, sinunod ko ang pelikulang O P E N. Pagkatapos ng pelikula, gusto ko man balikan ang nakaraan,  mas pinili ko na huwag na lang. Mapasalita o isipin, di ko na ginawa habang kasama ang kaibigan ko. Sa'yo ko nalang share bebeblog ang thoughts ko sa movie na ito. Ang sakit ng pelikulang ito. Yung kasama ko iyak ng iyak eh. Ako napaluha lang. Hahaha Ramdam ko ang sakit lalo na sa linyang "kulang na kulang ba ako?" tsaka "Bakit mo ako sinaktan? Twice?" Gusto ko kotongan yung lalaki sa pelikulang ito, pero nais ko rin unawain, sya kasi ang weakest link sa ganap na ito. Yung idea pa lang ng o p e n r e l a t i o n s h i p eh nakakagago na eh, paano pa kung iaapply nyo diba. Exciting pero risky din sa kalusugan. Yung mura ni Rome dun, ang intense. Sobrang ang galing nya dun. Yung pakiramdam na pumayag ka na nga sa kagaguhan na yun, tas malalaman mo may mas gago pa palang ginawa. Dobleng sakit ng scene nila sa parking. Isa pa nakayanig sakin yung part na sinabi ni Rome, “Para akong mababaliw kakaisip asan ka, sino kasama mo, anong gagawin niyo?” tapos yung diring diri siya sa sarili nya. Naramdaman ko ang trauma sa kanya. Nakakaawa sila pareho na ganun ang nangyari sa relasyon nila. Kasi naman naknamputang 14years tapos ganyan. Mapapamura ka talaga ng matindi. Mapa kay Rome o Ethan, marami ka matutunan sa movie na ito. Dapat sa pagpasok ng relasyon, pareho kayong buo at hindi para buoin pa ang isa't isa. Panoorin mo ang pelikukang ito para alam mo na ang gagawin kapag papasok ka na muli o papasok palang sa relasyon.

(o'. 'o)

Labolabona!

Hello. Uhm saan ko ba sisimulan. Bukas madami pagbabago sa work ko. Sobrang nakakalungkot pero ayoko magpaapekto dahil napagod na ko umiyak nung isang araw. Hintayin nalang ang meeting bukas. Ang daming ganap ng nakaraang linggo ko at sa darating na buong linggo. Kahapon, pumunta pala kami sa d r t s h o w. Nakabili ako mask at booties. May booties na ko eh kaso bumili ako mas mataas at makapal na booties pero quality na yung isa ko kaso mas maganda daw makapal ang tapakan. Suotin ko nalang kapag may normal na swimming na lang. Maganda bumili dun dahil nakasale. Nakatipid kami kumbaga kaysa bumili ng original price. 3 kami bumli mask. Kikay nabili ko pink. Black na may pink. Lol. Tapos, sa ganap sa work na magulo, napakain ako ng buong week, last week, nadagdagan weight ko. Yung di mo alam san landas patungo tas sumabay pa lakbay ko pa Malaysia sa wednesday night. May kasama ako this time. Nawala excitement ko mula ng malaman ang ganap sa work ngunit wala makakapigil sa pagpunta dun. Oh eh di good luck sa damit ko dun tsaka bahala na sa ganap sa work. Hahaha pero wala ng may pake basta usapan namin magswimsuit kami tas yung sa work bahalanasilajan kasi ayaw naman nila kami pakinggan. Tas bebeblog, magbabalik mansanas na ko anytime this month. Syempre mas mababang unit lang at 2nd hand dahil wala naman ako pambili brand new ng latest nila. Haaaaayy. Iniisip ko ibenta tong gamit ko ngayon, v i v o x21 128g dual sim. Sulit tong fon na to. Bili na, charot! Kaso di ko pa din alam ilelet go ko na number. Sun o globe number kaya? Bahala na kapag nakuha na. Tsaka nagyayaya pala ng dive sa 22, iniisip ko kung sasama ako kasi tangina ang gastos gastos na. May gusto pa ko attendan sa 21, gig tsaka play naman sa Lucena. Iniisip ko pa kung pupunta mag-isa sa play o gig. Kailangan din mamili. Pero ang alam ko lang, gastos! Utang na to bah! Nyahaha.

Yung work ang nakakapagpaanxious sakin sa totoo lang. Pero.. I have big problems? I have a bigger God. Kaya sa ngayon, easyhan ko lang, kapag off, off! bukas na usapang work. So bukas na, sana maging maayos na ang lahat. Good night.

(o'. 'o) 

W a s a k

Sobrang wasak ang puso namin lahat. Hindi namin inaasahan ang ganap na ito sa work. Hindi talaga namin alam kung saan kami patungo. Basta ang alam namin,  kailangan naming umalis. Paalam tgyty. Kung saan mapapadpad, sana magkakasama pa rin kami. Mugto na mata ko kakaiyak. Hindi ko pinakita ang pagiyak ko sa madaming tao. After meeting, lumayo ako at nagiiiyak. Grabe sila sa amin. Sabi ng tatay namin, na inalis nila, magtiwala lang daw sa nakakataas ng ahensyang pinagtratrabahuhan namin. Aalis naman kami, bakit kailangan alisin ang ulo namin. Hay. Babawiin ka namin, Itay. Sana nga mabawi ka namin at magkasama sama pa tayong lahat muli. Kapag umalis na siya, baka dun umiyak na ako sa harapan nya. Sana makayanan ko na wag umiyak. Hay. Iba ang nagagawa ng kapangyarihan, grabe sila sa amin. :(

Ang lala! Ako'y nalulungkot, nagagalit at natatakot sa kung anuman ang kahihinatnan ng ganap na ito. Kayo na po bahala sa amin, Papa God. Magtitiwala.

(o'. 'o) 

Hanglaki

Nagdive na ako today dahil bukas hindi na ako kasama. Alam mo ba, nakakita kami ng G i a n t T r e va l l y! Ang lala ng laki nya. Mga ilang ikot din siya sa harap namin. Medyo nakakatot din pala pero natuwa ako. First time ko makakita ng malaking isda. Yung mga kasama ko na matagal ng divers,  unang beses lang din nila makakita ng ganyang kalaki na GT at malapitan pa. Sulit ang dive na ito. Screenshots lang yan mula sa video, maliban sa unang picture. Tsaka sa araw na ito, nabeat ko yung dating depth ko mula sa last dive. Ang lakas alon kanina sa taas buti nakaalis at nakarating ng safe. Salamat po. Hanggang sa susunod na sisid!

(o'. 'o)

T r u s t the p r o c e s s

Nagkaroon kami ng emergency meeting kanina. Ayoko idetalye. Nalulungkot ako. Ganun pa man trust the process ang peg ko. Kung ano ang will ni PapaGod sa amin, tatanggapin ko. Kapag nagkataon next month madaming padaadjust ang magaganap. Hay.

Maiba, sa Sunday kasama ako sa dive. Sa ngayon, ipapatong ko sa leggings ko yung nabili ko dati na below the knee pants. Kaso 3mm lang siya. Wag na sana ako masugatan, kundi need ko ata talaga wet suit na next time. Hirap kasi isuot nun tsaka parang wala ako makita na kasya sakin kaya ayoko nun. Ehe. Di na makirot ngunit nagpeklat na yung sugat ko sa tuhod. Kasama ng sugat ko ng plumakda ako kaya sugatan tuhod tas nagbutlig butlig na tsaka eto ngayon, ang panget na pala tignan ng tuhod ko. Wawa. Goodluck sa susunod na sisid. Sana makakita na ko pawikan at sana maging maayos naman.

Ngapala, 2nd week ng September may lakbay ako, sumabay pa ang ganap sa work. May two weeks ako magligpit ng gamit at the same time, two weeks para ayusin work ko at two weeks magpaliit tyan dahil sa lakbay ko magsusuot ako swimsuit. Lakas. Hahaha

Sa totoo lang, pinipilit o  uhm pinipili ko kumalma sa ganap sa buhay ko. Nagulat kaming lahat eh, na eto na naman, eto na pala. Agad agad man, tiwala lang.

(o'. 'o)

Langoy pa.

Bangs! HAHAHA nagpagupit ako ng buhok nung last na holiday na Miyerkules. Nagdive kami last Sunday. 5th dive ko na ito. Ang daming isda. Kaso nasugatan tuhod ko ng corals :( Ang sakit nung parteng yun,  namumula nga sya ngayon. Kailangan talaga makapal gamitin na pants. Tsk. Pero masaya sa ilalim. Excited ako sa mga darating na dive. Sa darating na Sunday may dive ulet, kaso pala hindi ako sure kung makakasama ako pero gusto ko. Ang dami ko bayarin ngayong katapusan eh. Bills bills bills. Sasama o sasama?

(o'.'o)

N E M O

Hello bebeblog! Natapos ang unang dive ko sa dagat last weekend. Positibo naman ang feedback nung dive instructor namin. Kailangan pa lang magpractice pa kami ng finning. So far, natutuwa siya at mabilis kami matuto. Aga kami nakapagcheckout, pasado ako. Wala na matindihang tutukan na naganap sa amin. Sobrang nagenjoy ako. May naging konting problema lang nung sa last day na check out, pagkaahon ko biglang sumingaw bcd ko (may bumara pala na bato)  pero buti daw kalmado ako nakarating ng ako shore ng payapa. Sunod lang sa instructions at dapat wag magpanic kundi tegi, di na siguro nila nalaman kung san ako unti unting lumulubog kundi ako nakasigaw para sabihin na ayaw maginflate bc ko.  Kaso sa susunod, wag daw ako ngumiti pa kung emergency na. Ang nangyari kasi nginitian ko pa muna yung kasama naming babae na friend ko, tas bumaling ako patalikod para hanapin ang dive instructor. Buti narinig ako. Napuri pa din naman ako sa pagkakalma ko kahit papano. Woot. Ay ngapala, NAKITA KO SI NEMO! Ang cute. Excited ako makakita ng iba pang mga isda pero mas focus muna ako sa finning ko. This week, sa linggo, exam kami tapos next week dive ulet. 

Ngapala, aattend kami sa September ng DRT Show. Sana makabili na ko mask dun tsaka balak ko din bumili fins pero depende pa, mahal fins. Pinagpipilian ko kung pink o white may rashguard ako na pink pero mas matimbang sakin ngayon ang white fins. Mask kailangan ko na talaga. Isa isa lang. Kaya baka mask muna.

Ay yung sa timbang ko, share ko lang,  Naalala ko sa pagod ko sa langoy, napatinapay with icecream ako. Hindi na mauulit. HAHAHA Sinabihan din ako na magweights na.. lumalawlaw na yung taba sa braso ko. Kailangan daw itone. Hala. Target weight 65kg for this month. From  80kg, 70kg ako ngayon. :) pag nag 60 ako, dami nagpromise ng samgyup sakin, kaya sana mameet ko yung target na yun this year. Laban! Nyahahaha

(o'. 'o) 

OK

First week of July nagkaroon kami ng lecture tungkol sa scuba diving. Natapos kami ng pool session last week. Bukas, sa dagat na kami. 2 days training, Sabado at Linggo nasa Batangas ako. Uhm.. Yes, kumuha ako ng open water diver course. Tagal ko hinintay ito. Naalala ko kasama ako ng tropa sa introdive nila, di ako lumangoy, hanggang sa nagtake sila ng course. Una ayoko pa, kasi nga magastos tsaka madami ako ganap kapag weekend nung 2017 pa ata to eh. Tapos nung gusto ko na sumama, wala tapos na sila. Di ako maisingit dahil magisa lang ako. Di ako priority, wawa. Hahaha Buti ngayon naging apat kaming interesado, may kasabay na ako kaya natuloy na.

Sana maging maayos naman buong ganap namin dun. Sa pool kalma naman ako. Nagawa ko naman mask clearing at regulator recovery. Ang lala nung anak nung dive instructor namin, sabi mas mahigpit, oo nga sa kanya kami napunta tas pinagawa nya yun sakin ng sabay. Tas sa  ilalim twice nya bigla tinanggal regulator ko. Takte nun, napakunot ako noo, muntik na mawala sa isip ko na instructor ko din yung bata na yun. Hahaha Buti kalma lang ako at di nalunod. Sa buoyancy ang medyo tagilid ako. Sana makuha ko na bukas yun. Sana ganun din ako sa dagat na mismo, kalma lang. Masama ang panahon sa mga nagdaang araw. Sana bukas maging maayos na. Actually gusto ko nga tanungin sa group chat kung hindi ba delikado yung ganitong panahon pero naisip ko, alam naman yun ng dive instructor namin, kung delikado o hindi. Hindi makakasama yung isa kasi malala ang sipon niya kaya rescheduled siya next month. Gumora na ko kasi baka sumabay ang schedule sa ganap ko next month. Baka hindi tumugma sa schedule ko, kaya heto na, sisisid na bukas. Sana maipasa ko ang course na ito. :) Salamat Papa God.

(o'. 'o) 

Nakakatuwa din pala

Nakakatuwa din pala. Nahihilig kasi ako sa pagluluto. Nagustuhan nila lahat luto ko. Ang saya lang sa pakiramdam. Lutong bahay lang naman niluluto ko, madalas ang tropa kakain sa bahay tapos ako magluluto. Madalas adobo lol. Tsaka may 2 ako suki na bumibili luto ko. Nakapag sinampalukan na manok na ko, adobo,  pininyahan (di ako mahilig sa pinya tho), waknatoy. Balak ko aralin yung mechado ng tita ko tsaka kaldereta ng tito ko. :)

(o'. 'o)

S a l e

First time ko bumili neto. Dinadaanan ko lang siya palage at hindi ako bumibili kasi namamahalan ako, minsan nga di ko na din tinitignan kasi di naman ako bibili pero alam ko naman na maganda quality nya. Pagcheck ko kahapon, naka50% discount, waaa dami ko kilig kaya binili ko na. Natutuwa ako. Baby blue na may line na pink ang sa akin. Gusto ko pa sana yung army green na classic, pero gusto pala ng pamangkin ko kaya sa kanya nalang yung bibilhin bukas. Sama ko sa iba ko pa friends na bibili. Peach ang gusto nyang kulay. Hangkyut nya talaga!

Ngapala, maiba, update lang, kailangan ko na bumili ng belt. Alam mo na yun. HAHAHA

(o'. 'o)

T A B A

Mataba ako? Oo. Ilang buwan ko na nilalabanan ang lower back pain. Ilang beses ko naranasan yung tipong 'di ka makabangon agad dahil ang sakit ng likod mo, kagaya ngayon. Aw. Kinailangan ko pa may makapitan upang makatayo. Ilan beses na din ba ako nagsabi ng magpapapayat pero wala eh, masarap talaga kumain ng masarap. Mahina ako pagdating sa pagkain na matamis gaya tsokolate, ice cream, chocolate cake at basta madami akong paboritong pagkain. Tumigil din ako sa pagbili ng pantalon dahil nasisikipan ako,  nakakairita sa pakiramdam. Gusto ko yung kumportable lang. Cute naman maging malusog eh ang kaso madalas ang lower back pain ko sanhi ng excess weight. Araw ng Kalayaan ngayon taon, biglang ayoko na. Obese II kasi ako, matagal na. Sa sobrang tagal, naging kampante ako, kahit pa binibiro nila ako dahil sobrang laki ng pata at braso ko, wala naman akong pake tsaka tanggap naman nila ako. Kaso naisip ko, mag-isa nga pala ako. Paano na, kung ultimo pagsarado ng zipper ng uniform ko sa likod eh hirap ako. Hanggang sa sinabi ko sa sarili ko, hindi na pwede to, nagdesisyon na ko, at sana naman sa pagkakataon na to, huli na ang pagbabalewala sa kalusugan ko. Tama na muna ang pagkain ng sobra. Bye na muna milk tea.  Hindi nadin muna kakain ng mga paborito ko. Waaa~ Kanina muntik na ako sumuko. Gusto ko na kumain ng pizza, pasta at nachos, lahat ng nakausap ko nagsabi na "huwag" kasi ilang linggo nadin tong laban ko na to. Nakita nila ang pagtitimpi at hirap ko. Dumating pa nga sa punto na napapamura na ko sabay magtatawanan kami dahil wala ako maorder tuwing tatambay sa SB. Palage nalang mapait at ayoko na uminom ng mapait. Hahaha Feeling ko nga minsan ang arte ko dahil naging pili ang kinakain ko. Di ko na tuloy makain yung cereals at gatas sa ref. Tsk. Sa ngayon, wala akong nakikitang pagbabago sa katawan ko pero hayaan na. Heto nalang muna, magiisang buwan pa lang naman. Wag daw ako mainip, sabi nila. Sana magtuloy tuloy na talaga at huwag ako landiin ng mga paborito ko dahil marupok ako. Nyahahaha Balitaan kita sa susunod kung may pagbabago. Sana hindi pa huli ang lahat, dahil ayoko din naman magkadiabetes. Kaya? Kakayanin. Laban? Oo naman.

(o'. 'o)

Isa pang hikaw

Isa pang butas muli sa tenga. Sa cartilage sana kaso matagal daw magheal, eh may lakbay ako sa Agosto. Sa wakas, makakalangoy na at masisisid ang ilalim ng dagat. Nawa'y makapasa dahil matagal ko ng gusto masaksihan ang ganda ng ilalim.🐠

Ambilis ng panahon, mag-isa pa rin. Nagpapasalamat sa mga taong pinipili ako maging kaibigan o tinuturing na kapamilya sa araw-araw.

(o'. 'o)